அயர்லாந்துக்கு எதிரான ஒரே டெஸ்டில் வெற்றி பெற்ற ஆப்கானிஸ்தான் அணி, டெஸ்ட் அரங்கில் தனது முதல் வெற்றியை பதிவு செய்து வரலாறு படைத்தது. இந்நிலையில் மற்ற அணிகளுக்கு முதல் வெற்றி பெற எத்தனை வருடங்களானது என பார்க்கலாம்.

இந்தியாவின் உத்தர்காண்டில் ஆப்கானிஸ்தான், அயர்லாந்து அணிகள் 3 டி-20, 5 ஒருநாள், ஒரே ஒரு டெஸ்ட் போட்டிகள் கொண்ட தொடரில் பங்கேற்றது. டி-20 தொடரில் ஆப்கானிஸ்தான் அணி, 3-0 என வென்றது.

தொடர்ந்து நடந்த 5 போட்டிகள் கொண்ட தொடர் இரு அணிகளும் தலா 2-2 வென்றது. 1 போட்டிக்கு முடிவு இல்லாமல் போனது. இந்நிலையில் இரு அணிகள் மோதிய ஒரே ஒரு டெஸ்ட் போட்டி டேராடுனில் கடந்த 15ம் தேதி துவங்கியது.

இதில் அயர்லாந்து அணி முதல் இன்னிங்சில் 172 ரன்களுக்கு சுருண்டது. ஆப்கானிஸ்தான் அணி முதல் இன்னிங்சில் 314 ரன்களுக்கு ஆல் அவுட்டானது. தொடர்ந்து இரண்டாவது இன்னிங்சில் அயர்லாந்து அணி 288 ரன்களுக்கு ஆல் அவுட்டானது.

சுலப இலக்கு:
இதையடுத்து 146 என்ற மிகச்சுலபமான இலக்கை துரத்திய ஆப்கானிஸ்தான் அணிக்கு ஜன்னத் (65*), ரஹ்மத் ஷா (76) ஆகியோர் கைகொடுக்க, ஆப்கானிஸ்தான் அணி இரண்டாவது இன்னிங்சில் 3 விக்கெட்டுக்கு 149 ரன்கள் அடித்து 7 விக்கெட் வித்தியாசத்தில் வெற்றி பெற்றது.

வரலாறு:
இந்நிலையில் பங்கேற்ற இரண்டாவது டெஸ்டிலேயே வெற்றி பெற்று ஆப்கானிஸ்தான் அணி டெஸ்ட் அரங்கில் முதல் வெற்றியை பதிவு செய்து வரலாறு படைத்தது. முன்னதாக கடந்த ஆண்டில் இந்திய அணிக்கு எதிரான டெஸ்டில் பங்கேற்ற ஆப்கானிஸ்தான் அணி தோல்வியடைந்தது.