91 ஆவது ஆஸ்கர் திரைப்பட விருது விழா அமெரிக்காவின் லோஸ் ஏஞ்சல்ஸ் நகரில் கோலாகலமாக நடைபெற்றது. பல்வேறு பிரிவுகளில் சிறந்த படங்களுக்கு விருதுகள் அறிவிக்கப்பட்டன.

காலை 7 மணியளவில் லோஸ் ஏஞ்சல்ஸில் உள்ள டால்பி தியேட்டரில் ஆரம்பமான இந்த நிகழ்ச்சி தொகுப்பாளர் இன்றி நடைபெற்றது.

இதில் 2019 ஆம் ஆண்டிற்கான சிறந்த நடிகருக்கான விருதை Bohemian Rhapsody திரைப்படத்திற்காக Rami Malek வென்றுள்ளார்.

அத்துடன் 2019 ஆம் ஆண்டிற்கான சிறந்த நடிகைக்கான விருதை The Favourite திரைப்படத்திற்காக Olivia Coleman வென்றுள்ளதாக சர்வதேச செய்திகள் தெரிவிக்கின்றன.

சிறந்த இயக்குநருக்கான ஆஸ்கர் விருது, Roma திரைப்படத்தை இயக்கிய Alfanzo Cuaron-க்கு வழங்கப்பட்டது.

சிறந்த கேமரா ஒளிப்பதிவுக்கான ஆஸ்கர் விருது “ரோமா” திரைப்பட ஒளிப்பதிவாளர் அல்ஃபோன்சோ குவாரானுக்கு வழங்கப்பட்டது. இந்த திரைப்படம் 10 பிரிவுகளில் விருதுக்கு பரிந்துரைக்கப்பட்டது.

சிறந்த படத்தொகுப்பான விருது Bohemian Rhapsody திரைப்படத்தில் பணியாற்றிய ஜான் ஓட்மேன் என்பவருக்கு வழங்கப்பட்டது. சிறந்த SOUND EDITING-க்கான ஆஸ்கர் விருதையும் Bohemian Rhapsody படம் தட்டிச் சென்றது. இதேபோன்று, சிறந்த SOUND MIXING-க்கான விருதையும் Bohemian Rhapsody வென்றது.

சிறந்த வெளிநாட்டு திரைப்படத்துக்கான விருதை மெக்சிகோ திரைப்படமான ரோமா தட்டிச் சென்றது. வெனிஸ் திரைப்பட விழாவில் ´கோல்டன் லயன்´ பரிசு பெற்ற ரோமா, ஆஸ்கர் விழாவில் வெளிநாட்டு திரைப்படத்தை வெல்லும் என ஏற்கனவே எதிர்பார்க்கப்பட்டது.

சிறந்த ஒப்பனை மற்றும் சிகை அலங்காரத்துக்கான ஆஸ்கர் விருதை VICE திரைப்படம் படம் தட்டிச் சென்றது. சிறந்த ஆடை வடிவமைப்பாளருக்கான ஆஸ்கர் விருது “Black Panther” படத்திற்காக ரூத் கார்ட்டருக்கு வழங்கப்பட்டது. விருதை ரூத் கார்ட்டர் ஆனந்த கண்ணீருடன் பெற்றுக் கொண்டார். சிறந்த பின்னணி இசைக்கான விருதையும் Black Panther தட்டிச் சென்றது.

சிறந்த துணை நடிகைக்கான ஆஸ்கர் விருது, IF BEALE STREET COULD TALK படத்தில் சிறப்பான நடிப்பை வெளிப்படுத்தியதற்காக ரெஜினா கிங் என்பவருக்கு வழங்கப்பட்டது. சிறந்த துணை நடிகருக்கான விருதை GREEN BOOK திரைப்படத்தில் நடித்த மகெர்ஷலா அலி வென்றார்.

சிறந்த அனிமேஷன் திரைப்படத்துக்கான ஆஸ்கர் விருது கடந்தாண்டு வெளியான SPIDER-MAN INTO THE SPIDER VERSE திரைப்படத்துக்கும், சிறந்த அனிமேஷன் குறும்படத்துக்கான விருது போ (bao) திரைப்படத்துக்கும் வழங்கப்பட்டது. சிறந்த லைவ் ஆக்சன் குறும்படத்திற்கான ஆஸ்கர் விருது SKIN படத்திற்கு வழங்கப்பட்டது.

சிறந்த விஷுவல் எஃபெக்ட்ஸ்க்கான ஆஸ்கர் விருது “ஃபர்ஸ்ட் மேன்” படத்திற்காக பால் லாம்பெர்ட், இயான் ஹண்டர், டிரிஸ்டன் மைல்ஸ், ஜே.டி.ஸ்ச்வாம் ஆகியோருக்கு கூட்டாக வழங்கப்பட்டது.

உண்மை கதையை மையமாக கொண்டு உருவான க்ரீன் புக் திரைப்படத்துக்கு சிறந்த திரைக்கதை மற்றும் சிறந்த திரைப்படத்திற்கான ஆஸ்கர் விருதும், பிளாக் க்ளான்ஸ்மேன் திரைப்படத்துக்கு சிறந்த தழுவல் திரைக்கதைக்கான விருதும் வழங்கப்பட்டது.