இங்கிலாந்தில் உள்ள எஸ்ஸெக்ஸ் கவுண்டியில் கண்டெய்னர் லாரி ஒன்றில் இருந்த 39 பேரின் சடலங்களை காவல்துறையினர் அகற்றியுள்ளனர்.

சீன குடிமக்கள் என்று கருதப்படும் 11 பேரின் உடல்கள் டில்பர்ரி துறைமுகத்தில் இருந்து செலம்ஃபேர்டிலுள்ள புரூம்ஃபீல்ட் மருத்துவமனைக்கு கொண்டு செல்லப்பட்டுள்ளது.

31 ஆண்கள் மற்றும் எட்டு பெண்களை கொன்றிருக்கலாம் என்ற சந்தேகத்தின் பேரில் 25 வயதான லாரி ஓட்டுநர் ராபின்சனை விசாரிக்க மேலதிக நேரம் காவல்துறைக்கு வழங்கப்பட்டுள்ளது.

பிரேதப் பரிசோதனை புலனாய்வின் அடுத்த கட்டமாக இருக்கும்.

பிரிட்டன் நேரப்படி 24ம் தேதி மாலை 7:41 மணிக்கு துறைமுகத்தில் இருந்து இந்த சடலங்கள் ஆம்புலன்ஸில் கொண்டு செல்லப்பட்டன.

வடக்கு அயர்லாந்தை சேர்ந்த இந்த ஓட்டுநரோடு தொடர்புடைய 3 இடங்களில் தேடுதல் வேட்டை நடத்தப்பட்டுள்ளது. இதனை குற்ற குழுக்கள் ஒருங்கிணைந்து செய்தனவா என்ற கோணத்திலும் தேசிய குற்ற முகமை ஆராய்ந்து வருகிறது.

முன்னதாக, இங்கிலாந்தில் எஸ்ஸெக்ஸ் கவுண்டியில் ஒரே கண்டெய்னர் லாரியில் இருந்து 39 பேரின் சடலங்கள் கண்டுபிடிக்கப்பட்டன. இறந்தவர்கள் யார் என்று அடையாளம் காணும் முயற்சியில் காவல் துறை அதிகாரிகள் ஈடுபட்டிருந்தனர். இந்நிலையில் இறந்தவர்கள் அனைவரும் சீனர்கள் என்பது கண்டறியப்பட்டுள்ளது.

சந்தேகத்தின் பேரில் கைது செய்யப்பட்ட அந்த வாகனத்தின் ஓட்டுநர் ராபின்சனிடம் தொடர்ந்தது விசாரணை நடைபெற்று வருகிறது.

வடக்கு அயர்லாந்தில் அதிகாரிகள் மூன்று இடங்களை சோதனை செய்துள்ளனர். மேலும் திட்டமிட்டு குற்றங்களை செய்யும் கும்பல்களின் தலையீடு இதில் இருக்க வாய்ப்புள்ளதாக தேசிய குற்றவியல் முகமை கூறியுள்ளது.