இந்தோனேசியாவின் லாம்போக் தீவில் கடந்த ஞாயிற்றுக் கிழமை இரவு ஏற்பட்ட சக்திவாய்ந்த நிலநடுக்கத்தில் உயிரிழந்தவா்களின் எண்ணிக்கை 300ஐ தாண்டியுள்ளது.

இந்தோனேஷியாவின் லாம்போக் தீவில் கடந்த ஞாயிற்றுக் கிழமை இரவு கடலுக்கு அடியில் அடுத்தடுத்து இரண்டு நிலநடுக்கங்கள் ஏற்பட்டன. ரிக்டர் அளவுகோலில், 7 ஆக பதிவான இந்த நிலநடுக்கத்தால் லாம்போக் தீவில் இருந்த வீடுகளும், கட்டிடங்களும் குலுங்கின. இதனால் மக்கள் அலறியடித்து கொண்டு தெருக்களில் தஞ்சம் புகுந்தனர்.

இந்த நிலையில், நிலநடுக்கத்தில் சிக்கி உயிரிழந்தோரின் எண்ணிக்கை 300ஐ கடந்துள்ளதாக தேசிய பேரிடர் மீட்புப் படையினர் தெரிவித்துள்ளனர். நில நடுக்கத்தால் 80 சதவீத வீடுகள் சேதமடைந்துள்ளதாகவும், ஆயிரக்கணக்கான மக்கள் வீடுகளை இழந்துள்ளதாகவும் செய்திகள் வெளியாகியுள்ளது.

இதனிடையே நிலநடுக்கம் பாதித்த பகுதிகளில் முகாமிட்டுள்ள தேசிய மீட்பு படையினர் இடிபாடுகளில் சிக்கியுள்ளவா்களை பாதுகாப்பாக மீட்கும் பணியில் ஈடுபட்டுள்ளனர். சுமார் 20 ஆயிரத்துக்கும் மேற்பட்டோர் பாதுகாப்பான இடங்களுக்கு அனுப்பப்பட்டுள்ளதாக மீட்புப் படையினர் தெரிவித்துள்ளனர்.