நடிகர் ராகவா லாரன்ஸ் தனது சமூக வலைத்தள பக்கத்தில் முக்கிய பதிவு ஒன்றை இட்டுள்ளார். அதற்கு, ”வளர்ந்து வருகிற ஒரு அரசியல் தலைவருக்கும் அவரது தொண்டர்களுக்கும் ஒரு வேண்டுகோள் மற்றும் எச்சரிக்கை” என்று தலைப்பிட்டுள்ளார்.

அதாவது நாம் தமிழர் கட்சியின் சீமானை நேரடியாக குறிப்பிடாமல் பதிவிட்டுள்ளார். அதில், உங்கள் தொண்டர்கள் சிலர், எனது சேவை தொடர்பான பதிவுகளில் மிகவும் கீழ்த்தரமாக, கொச்சையாக, அசிங்கமாக பதிவிட்டு வருகின்றனர்.

இது பெரும் மன உளைச்சலை ஏற்படுத்துகிறது. நான் ஏதாவது ஒரு பொது நிகழ்ச்சிக்கு போகும் போது கூட, உங்கள் தொண்டர்கள் மிகவும் நாகரீகமற்ற முறையில் மறைமுகமாக பேசுகிறார்கள். நீங்கள் மேடையில் என்னைப் பற்றி தவறாக பேசினீர்களோ, அப்போதில் இருந்து நடந்து வருகிறது.

இதை பற்றியெல்லாம் நான் கவலைப்படுவதில்லை. ஆனால் மாற்றுத் திறனாளிகளான எனது பசங்க, நிகழ்ச்சி நடத்த செல்லும் போது, உங்கள் தொண்டர்களால் பெரும் மன வருத்தத்திற்கு ஆளாகின்றனர். இதை என்னால் தாங்கிக் கொள்ள இயலாது.

அரசியலில் இதுவரை ஜீரோவாகத் தான் இருக்கிறேன். அதில் ஹீரோவாக்கி என்னை அரசியலில் இழுத்து விட வேண்டாம். சமாதானமா? சவாலா? நீங்களே முடிவு செய்து கொள்ளுங்கள். சாய்ஸ் யுவர்ஸ் என்று சீமானுக்கு எச்சரிக்கை விடுக்கும் வகையில் பதிவிட்டுள்ளார்.

இதுகுறித்து தென்சென்னை பிரச்சாரக் கூட்டத்தில் பங்கேற்ற சீமானிடம் கேள்வி எழுப்பப்பட்டது. அதற்கு அவர், அதைப் பற்றி நான் கேள்விப்படவில்லை. என்னை வைத்து பலரும் பொய்யான வதந்திகளை பரப்பி வருகின்றனர் என்று கூறினார்.