கடந்த 2017ல் வெளியாகி மிகப்பெரிய வரவேற்பை பெற்ற படம் ’மாநகரம்’. அறிமுக இயக்குநர் லோகேஷ் கனகராஜ் இயக்கத்தில் வெளியான இப்படம் பாராட்டுக்களை குவித்தது. மேலும், வசூல் ரீதியாகவும் வெற்றி பெற்றது.

தற்போது லோகேஷ் கனகராஜ், ட்ரீம் வாரியஸ் நிறுவனத்திற்காக தனது இரண்டாவது படத்தை இயக்கி வருகிறார். ‘கைதி’ என்ற பெயரில் தயாராகி வரும் படத்தில் கார்த்தி முதன்மை கதாபாத்திரத்தில் நடிக்கிறார்.

இந்த படத்தில், ’சித்திரம் பேசுதடி’ நரேன், யோகி பாபு, பொன்வண்ணன், மகாநதி சங்கர், ’தலைவாசல்’ விஜய் ஆகியோர் நடித்து வருகின்றனர். அதிரடியாக த்ரில்லர் பாணியில் இப்படம் தயாராகி வருகிறது.

மிக விறுவிறுப்பாக நடைபெற்று வரும் இந்த படத்தின் படப்பிடிப்புக்கிடையில், படக்குழு ‘கைதி’ போஸ்டரை வெளியிட்டுள்ளனர். அந்த போஸ்டரில் நடிகர் கார்த்தி மிகவும் ஆக்ரோஷமாக காணப்படுகிறார்.

மேலும், கைதி படத்தின் டீசர் வரும் 30ம் தேதி வெளியிடப்படும் என அறிவிக்கப்பட்டுள்ளது. இந்த படத்தில் கதாநாயகி கிடையாது என்பது குறிப்பிடத்தக்கது.