பிக்பாஸ் முதல் சீசனில் பங்கேற்ற நடிகர் சக்தி, குடிபோதையில் வாகனம் ஓட்டி பிரபல காரை சேதப்படுத்திவிட்டதாக சென்னை காவல் நிலையத்தில் புகார் அளிக்கப்பட்டுள்ளது.

தமிழ் சினிமாவின் மூத்த இயக்குநர் பி. வாசுவின் மகன் சக்தி. சின்னத்தம்பி படத்தில் குழந்தை நட்சத்திரமாக அறிமுகமான இவர், தொட்டால் பூ மலரும் படத்தின் மூலம் கதாநாயகனாக நடித்தார். அதற்கு பிறகு நினைத்தாலே இனிக்கும், ஆட்ட நாயகன் உள்ளிட்ட பல படங்களில் நடித்தார்.

அதை தொடர்ந்து நடிகரும் மக்கள் நீதி மய்யம் கட்சியின் தலைவர் கமல்ஹாசன் தொகுத்து வழங்கிய பிக்பாஸ் சீசன் 1 நிகழ்ச்சியில் பங்கேற்ற அவர், அதன் மூலம் ’ட்ரிக்கர் ஸ்டார்’ சக்தி என்று ரசிகர்களால் அழைக்கப்பட்டார். மேலும் பிக்பாஸில் பெற்ற புகழ் மூலம், சினிமாவில் இழந்த தனது செல்வாக்கை அவர் மீட்டார்.

இந்நிலையில் நடிகர் சக்தி இன்று மதியம் சூளைமேடு இளங்கோவடிகள் நகரில் தனது காரில் சென்றுக்கொண்டிருந்தார். அப்போது சாலையில் நின்றுக்கொண்டிருந்த ஈகோஸ்போர்ட்ஸ் காரின் மீது மோதிவிட்டு நிற்காமல் சென்றுள்ளார்.

பிறகு பொதுமக்கள் அவரது காரை மடக்கி பிடித்து தடுத்த போது, காரை ஓட்டியது நடிகர் சக்தி என்பது தெரியவந்தது. மேலும், அவர் மதுபோதையில் இருந்ததையும் பொதுமக்கல் கவனித்தனர். இதனையடுத்து அண்ணா நகர் போக்குவரத்து காவலர்களுக்கு அவர்கள் தகவல் கொடுத்தனர்.
பிறகு சம்பவ இடத்திற்கு வந்த போக்குவரத்து புலனாய்வு காவல்துறையினர், நடிகர் சக்தியை விசாரணைக்காக அண்ணா நகர் காவல் நிலையத்துக்கு அழைத்து சென்றனர். இந்த விபத்தில் காயமோ, இழப்போ ஏற்படவில்லை என்றாலும் காவல்துறையினர் தொடர்ந்து விசாரணை மேற்கொண்டு வந்தனர்,

தற்போது கிடைத்த தகவலின்படி, கைது செய்யப்பட்ட நடிகர் சக்தி பிணையில் விடுதலை பெற்றுள்ளார். மேலும் நடிகர் சக்தி விபத்து ஏற்பட்ட போது ஓட்டிய காரை, அண்ணா நகர் காவல்துறையினர் பறிமுதல் செய்து நடவடிக்கை எடுத்துள்ளனர்.