கைது செய்யப்பட்டுள்ள குருணாகல் வைத்தியசாலையின் வைத்தியர் சட்டவிரோதமாக கருத்தடை சத்திரசிகிச்சை மேற்கொள்ளப்பட்டுள்ளதாக பத்துக்கு மேற்பட்ட முறைப்பாடுகள் பதிவு செய்யப்பட்டுள்ளன.

இதேவேளை, அந்த வைத்தியர் நாற்பது கோடி ரூபாவிற்கும் அதிக சொத்துக்களுக்கு உரித்துடையவர் என தகவல் கிடைத்துள்ளதாக பொலிஸார் தெரிவித்தனர்.

இரகசிய பொலிஸாரின் விசாரணைகளை அடுத்து, குறித்த வைத்தியர் கடந்த 24ஆம் திகதி கைது செய்யப்பட்டார்.

நாற்பது கோடி ரூபாவிற்கும் அதிக பெறுமதியுடைய சொத்துக்கள் அவரிடம் காணப்படுவதாக பொலிஸாருக்குத் தகவல் கிடைத்ததுடன், அவை ஏதேனும் கடும்போக்குவாத அல்லது பயங்கரவாத குழுவிடமிருந்து கிடைத்துள்ளதா என ஆராயும் நோக்கில் அவர் கைது செய்யப்பட்டதாக பொலிஸார் தெரிவித்தனர்.

அந்த வைத்தியரின் பெயரில் காணப்படும் 17 காணி உறுதிப் பத்திரங்களை பொலிஸார் கைப்பற்றியுள்ளனர்.

அந்தக் காணிகள் குருணாகலை சூழவுள்ள இடங்களில் அமைந்துள்ளதாக பொலிஸார் தெரிவித்தனர்.

இதேவேளை, சந்தேகநபரான வைத்தியர் சட்டவிரோதமாக கருத்தடை சத்திரசிகிச்சைகள் மேற்கொள்ளப்பட்டதாகக் கிடைத்த முறைப்பாடுகளில், நான்கு முறைப்பாடுகள் அவருடன் பணியாற்றிய வைத்தியர்களால் பதிவு செய்யப்பட்டுள்ளதாக பொலிஸார் தெரிவித்தனர்.

ஏனைய முறைப்பாடுகளை 28-30 வயதுக்கு இடைப்பட்ட பெண்களே பதிவு செய்துள்ளனர்.