உலகக்கோப்பை கிரிக்கெட் தொடரின் போது ஆஸ்திரேலிய வீரர்களான ஸ்டீவ் ஸ்மித், டேவிட் வார்னர் ஆகியோர் மீது தனிப்பட்ட முறையில் தாக்கும் படி ரசிகர்கள் நடந்து கொள்ளக்கூடாது என இங்கிலாந்து ஆல் ரவுண்டர் மொயின் அலி கேட்டுக்கொண்டுள்ளார்.

தென் ஆப்ரிக்காவில் கடந்த ஆண்டில் நடந்த டெஸ்ட் தொடரில் பங்கேற்ற போது ஆஸ்திரேலிய வீரர் பான்கிராப்ட் பந்தை சேதப்படுத்தி சிக்கினார். இதற்காக பான்கிராப், அப்போதைய கேப்டன் ஸ்டீவ் ஸ்மித், துணைக் கேப்டன் டேவிட் வார்னர் ஆகியோருக்கு ஆஸ்திரேலிய கிரிக்கெட் போர்டு தடைவிதித்து உத்தரவிட்டது.

இந்த தடைக்காலம் முடிந்து ஸ்மித், வார்னர் ஆகியோர் விரைவில் துவங்கவுள்ள உலகக்கோப்பை தொடரில் களமிறங்கவுள்ளனர். இதில் தங்களின் பரம எதிரியான இங்கிலாந்து அணியின் ரசிகர்களை எதிர்கொள்ள, தயாராக இருப்பதாக ஆஸ்திரேலிய அணி வீரர்கள் ஏற்கனவே தெரிவித்தனர்.

இந்நிலையில் இங்கிலாந்து ஆல் ரவுண்டர் மொயின் அலி, ஆஸ்திரேலிய அணி வீரர்களை தனிப்பட்ட முறையில் தாக்கும்படி நடந்துகொள்ளக்கூடாது என கேட்டுக்கொண்டுள்ளார்.

இதுகுறித்து மொயின் அலி கூறுகையில், ‘நாம் அனைவரும் மனிதர்களாக தவறு செய்வது என்பது சகஜமான விஷயம் தான். அவர்களும் இயல்பாக நல்லவர்கள் தான். கிரிக்கெட் வீரர்களாக அவர்களுக்கு இத்தொடரை முழுமையாக அனுபவிக்க எல்லா உரிமையும் உள்ளது. ரசிகர்கள் கிரிக்கெட் ரீதியாக அவர்களை கலாய்க்க எல்லா உரிமையும் உள்ளது. ஆனால் அவர்களை தனிப்பட்ட முறையில் விமர்சிக்க வேண்டாம்.’ என்றார்.