நடிகர் கமல்ஹாசன் நடிக்கும் இந்தியன் – 2 படத்தின் படப்பிடிப்பு, லோக்சபா தேர்தலுக்கு பின் நடத்தப்படும் என தகவல்கள் தெரிவிக்கின்றன.

பிரம்மாண்ட இயக்குனர் ஷங்கர் இயக்கத்தில், உலக நாயகன் கமல்ஹாசன் நடிப்பில் 1996ல் வெளியான படம் ‘இந்தியன்’. தற்போது இந்தப் படத்தின் இரண்டாம் பாகத்தை ஷங்கர் இயக்கி வருகிறார். இந்தப்படத்திலும் நடிகர் கமல்ஹாசன் ஹீரோவாக நடிக்கிறார். படத்தை லைகா நிறுவனம் தயாரித்து வருகிறது.

கடந்த ஆண்டு இந்தப் படத்தின் படப்பிடிப்பு பூஜையுடன் தொடங்கியது. ஆரம்பித்த வேகத்திலேயே சில நாட்களில் நிறுத்தப்பட்டது. இதனால், படக்குழுவினரிடையே பிரச்சினை, தயாரிப்பு நிறுவனத்தில் பணமில்லை என பல காரணங்கள் சொல்லப்பட்டது. அனைத்தையும் பொய்யாக்கும் விதமாக பிப்ரவரி 11-ம் தேதி மீண்டும் சென்னையில் ‘இந்தியன் 2’ படப்பிடிப்பு தொடங்கியது.

இந்தப் படத்தில் கமலுடன் காஜல் அகர்வால், நெடுமுடி வேணு, போமன் இரானி உள்ளிட்ட பலர் நடிக்கின்றனர். படத்திற்கு அனிருத் இசையமைக்கிறார். கமலுக்கு வில்லனாக அக்‌ஷய்குமார், அஜய் தேவ்கான், அபிஷேக் பச்சன் என பல்வேறு பெயர்கள் அடிபட்டு வருகின்றன. ஆனால், படக்குழுவினர் இதுவரை யாரையுமே அதிகாரப்பூர்வமாக உறுதிப்படுத்தவில்லை.

இந்நிலையில் தற்போது லோக்சபா தேர்தல் நடக்கவுள்ளதால், அதற்கு பின் படத்தின் ஷூட்டிங்கை நடத்தும் படி நடிகர் கமல் இயக்குனர் ஷங்கரிடம் கேட்டுக்கொண்டதாக தகவல்கள் தெரிவிக்கின்றன. இதற்கு அவர் ஒப்புக்கொண்டதால், இப்படத்தின் ஷூட்டிங் மீண்டும் மே மாதம் துவங்கவுள்ளதாக தகவல்கள் தெரிவிக்கின்றன.