ரூ.500, ரூ.1000 நோட்டு செல்லாது என பிரதமர் மோடியின் பணமதிப்பிழப்பு நடவடிக்கை நாட்டின் அழிவுக்கு வழிவகுத்தது என திமுக தலைவர் மு.க. ஸ்டாலின் தெரிவித்துள்ளார்.

கடந்த 2016ம் ஆண்டு, நவம்பர் 8ம் தேதி தொலைக்காட்சி வாயிலாக உரையாற்றிய மோடி ரூ.500 மற்றும் ரூ.1000 நோட்டுக்கள் இனி செல்லாது என அறிவிப்பை வெளியிட்டார். கருப்பு பணத்தை ஒழிக்க, இந்த கடினமான முடிவு எடுக்கப்பட்டதாக பாஜக விளக்கம் அளித்த போதும், பொதுமக்களை சிரமத்தில் தள்ளவே இந்த திட்டம் நடைமுறைப்படுத்தப்பட்டது என காங்கிரஸ் குற்றம் சாட்டியது.

பல இடர்பாடுகளுக்கு மத்தியில் மெல்ல சீரடைந்து, பணம் பரிவர்த்தனை முழுவதும் டிஜிட்டல் தளத்திற்கு மாறி வருவதாக பாஜக விளக்கம் அளித்தது. பணமதிப்பிழப்பு நடந்து இன்றுடன் இரண்டு ஆண்டுகள் முடிந்துவிட்டது. பண மதிப்பிழக்கத்தின் இரண்டாம் ஆண்டு தினத்தை நாட்டின் கருப்பு தினமாக அனுசரித்து காங்கிரஸ் கட்சியினர் இன்று போராட்டம் நடத்தி வருகின்றனர். மேலும் பல எதிர்கட்சிகளும் இதற்கு ஆதரவு தெரிவித்துள்ளன.

இந்நிலையில் இது தொடர்பாக ட்விட்டரில் கருத்து பதிவிட்டுள்ள மு.க. ஸ்டாலின், பணமதிப்பிழப்பு நடவடிக்கையால் அப்பாவி மக்கள் பலர் தங்களது உயிரை இழந்த சம்பவங்களை இந்த நாடு மறாவது. லட்சக்கணக்கானோர் வேலை இழந்து, சிறு மற்றும் குரு நிறுவனங்கள் மூடுவிழா கண்டு, நாட்டின் பொருளாதாரம் பின்நோக்கிச் சென்றுவிட்டது என திமுக தலைவர் ஸ்டாலின் அந்த பதிவில் குறிப்பிட்டுள்ளார்.