உலகம் முழுவதும் பத்து லட்சம் உயிரினங்கள் அழிவின் விளிம்பில் உள்ளதாக ஐ.நா.வின் ஓர் ஆய்வில் தெரியவந்துள்ளது.

ஐக்கிய நாடுகள் சபை சார்பில் அமெரிக்காவைச் சேர்ந்த குழு 50 நாடுகளில் 145 வல்லுநர்களைக் கொண்டு பல்லுயிர் பெருக்கம் குறித்து நடத்திய ஆய்வின் அறிக்கை வெளியாகிள்ளது. அதில், வரலாற்றில் இதுவரை இல்லாத அளவுக்கு மனிதர்கள் இயற்கையை நாசம் செய்வதாகவும் தாவரங்கள், விலங்குகள், பறவைகள், கடல்வாழ் உயிரினங்கள் என 10 லட்சம் உயிரினங்களை அழித்துக்கொண்டிருப்பதாவும் கூறப்பட்டுள்ளது.

மிக அரிய உயிரினங்களான சுமத்திரன் காண்டாமிருகம், டிட்டிகாகா நீர் தவளை, தாபிர், ராயல் ஆமை, சிஃபாகா குரங்கு, பிலிப்பியன் கழுகு, கருப்புக் கொண்டை குரங்கு உள்ளிட்ட இனங்கள் வேகமாக அழிந்து வருவதாக தெரிவிக்கப்பட்டுள்ளது. மூன்றில் ஒரு பங்கு பாலூட்டிகள், 40% நீர்நில வாழ் இனங்கள், 33% பவளப்பாறைகள் நீர் வாழ் இனங்கள் விரைவில் அழிந்துபோகும் நிலையில் உள்ளன.

காடுகளை அழிப்பது, நீர் நிலை மற்றம் நில ஆக்கிரமிப்பு, மட்காத பொருட்களின் பயன்பாடு, புவி வெப்பமயமாதல் என பல்வேறு காரணிகளால் மிகப்பெரிய திமிங்கலம் தொடங்கி சின்னஞ்சிறிய உயிரினங்கள் வரை பெரிய ஆபத்தைச் சந்திக்கின்றன என்று அந்த ஆய்வு கூறுகிறது.

ஐ.யு.சி.என். எனப்படும் சர்வதேச இயற்கை பாதுகாப்பு ஒன்றியம், உலகில் நான்கில் ஒரு பங்கு விலங்குகள் மற்றும் பறவைகள் அழிந்து வருவதாகக் கூறுகிறது. பூமியில் உள்ள லட்சக்கணக்கான உயிரினங்களுக்கு ஆபத்தை ஏற்படுத்தியிருப்பது மனிதர்களின் தவறுகள்தான் எனவும் இதுவே மனித இனத்துக்கும் நேரப்போகும் பேரழிவுகளுக்கு அறிமுறியாக இருக்கலாம் எனவும் இந்த அறிக்கை எச்சரிக்கிறது.