இந்த ஆண்டு ஐபிஎல்., தொடரை எங்கு நடத்துவது என்ற பெரும் குழப்பத்துக்கு பிசிசிஐ., முற்றுப்புள்ளி வைத்ததோடு, ஐபிஎல்., தொடர் துவங்கும் தேதியையும் அறிவித்துள்ளது.

இந்தியாவில் கடந்த 2008 முதல் ஆண்டுதோறும் உள்ளூர் டி-20 கிரிக்கெட் தொடரான இந்தியன் பிரீமியர் லீக் (ஐ.பி.எல்.,) கிரிக்கெட் தொடர் நடக்கிறது. இத்தொடர் வெற்றிகராமாக 11 ஆண்டுகள் நடத்தப்பட்டதை தொடர்ந்து 12வது தொடரை எங்கு மற்றும் எப்போது நடத்துவது என பிசிசிஐ., பெரும் குழப்பத்தில் இருந்தது.

இந்தியாவில் இந்த ஆண்டு பொதுத்தேர்தல் நடக்கவுள்ளதால், அந்த தேதிகளில் இந்தியாவில் போட்டிகளை நடத்துவதில் சிக்கல் ஏற்படும். அதனால், இந்தியாவுக்கு வெளியே இத்தொடரை முழுமையாக மாற்றுவது குறித்து பிசிசிஐ., பெரும் குழப்பத்தில் இருந்தது. விருப்பமில்லை:
இத்தொடரை முழுமையாக இந்தியாவுக்கு வெளியே கொண்டு செல்ல வேண்டும் என்றால் தென் ஆப்ரிக்கா தான் முதல் தேர்வாக இருக்கும். பாதி வெளியே கொண்டு சென்றால் யுஏஇ.,யில் நடக்க வாய்ப்பு உள்ளது. ஆனால் இந்தியாவுக்கு வெளியே ஐபிஎல்., தொடரை நடத்துவதில் ஐபிஎல்., அணிகளுக்கு விருப்பமில்லை என தெரிகிறது.

இந்நிலையில் மே 30ல் இங்கிலாந்தில் உலகக்கோப்பை (50 ஓவர்) தொடர் நடக்கவுள்ளதால், அதற்கு முன்னதாக ஐபிஎல்., தொடரை முடிக்க வேண்டிய நிலை ஏற்பட்டுள்ளதால், அதனால், வழக்கமான ஏப்ரல் முதல் வாரத்துக்கு பதிலாக, மார்ச் இறுதிவாரத்தில் ஐபிஎல்., தொடர் துவங்க வேண்டிய நிலை இருந்தது.

இந்நிலையில் ஏற்கனவே எதிர்பார்த்தது போல ஐபிஎல் ., தொடரை இந்தியாவிலேயே நடத்த பிசிசிஐ., முடிவு செய்துள்ளது. சுப்ரீம் கோர்ட் நியமித்த நிர்வாக அதிகாரிகள் குழு மத்திய மற்றும் மாநில அதிகாரிகளுடன் பேசி இதை உறுதி செய்துள்ளதாக தெரிகிறது.

இதனால் இந்த ஆண்டு ஐபிஎல்., தொடர் இந்தியாவில் நடப்பது உறுதி செய்யப்பட்டுள்ளது. தவிர, மார்ச் 23ம் தேதி இத்தொடர் துவங்கும் என பிசிசிஐ., அறிவித்துள்ளது.