உலகில் அசைவ உணவு சாப்பிடுகிறவர்களின் எண்ணிக்கை சைவ உணவு சாப்பிடுகிறவர்களை விட மிகவும் அதிகமாகும். அசைவ உணவு என்றாலே அனைவரின் நினைவிலும் முதலில் வந்து நிற்பது சிக்கன்தான். அதற்கு காரணம் அதன் சுவையும், விலையும்தான். உலகில் அதிகமானோரால் உண்ணப்படும் அசைவ உணவும் சிக்கன்தான்.

சிக்கன் சுவை மட்டுமின்றி பல ஆரோக்கிய நன்மைகளையும் வழங்கக்கூடியதாகும். ஏனெனில் நமது உடலுக்கு தேவையான பல ஊட்டச்சத்துக்கள் சிக்கனிலிருந்து கிடைக்கிறது. தினமும் சிக்கன் சாப்பிடுகிறவர்கள் கூட இருக்கிறார்கள். ஆனால் பெரும்பாலானோருக்கு இருக்கும் ஒரு சந்தேகம் சிக்கன் அதிகம் சாப்பிடுவது ஆபத்தை ஏற்படுத்துமா என்பதுதான். இந்த பதிவில் அதிக சிக்கன் சாப்பிடுவது ஆபத்தை ஏற்படுத்துமா என்று பார்க்கலாம்.

சிக்கன் அதிகம் சாப்பிடுவது ஆபத்து என்பது சந்தேகத்தையும் தாண்டி நம்பிக்கையாகவே மாறிவிட்டது. ஆனால் இது முற்றிலுமாக உண்மையல்ல. ஏனெனில் எந்த முறையில் சமைக்கிறோம் என்பதை பொறுத்துதான் அதன் விளைவுகள் கணிக்கப்படும். சிக்கனை பொறுத்த வரை அதிலிருந்து அதிக ஊட்டச்சத்துக்களை பெற அதை க்ரில் அல்லது ரோஸ்ட் முறையில் செய்து சாப்பிட வேண்டும்.

ஊட்டச்சத்து நிபுணர்களின் கருத்துப்படி 100 கிராம் சிக்கனில் 124 கலோரிகளும், 20 கிராம் புரோட்டினும், 3 கிராம் கொழுப்பும் உள்ளது. போதுமான அளவு கலோரிகளும், புரோட்டினும் இருப்பதால்தான் உடற்பயிற்சி செய்பவர்களுக்கு சிக்கன் சிறந்த உணவாக பரிந்துரைக்கப்படுகிறது.

சிக்கன் சாப்பிடும் அளவானது அவரவர் உடலமைப்பை பொறுத்து மாறுபடுவதாகும். ஒருவேளை நீங்கள் ஒரு சாதாரண ஆளாக இருந்து உங்களின் உடல் எடை 65 முதல் 75 கிலோக்குள் இருந்தால் நீங்கள் தினமும் 200 கிராம் சிக்கனை உணவில் சேர்த்து கொள்ளலாம்.

அளவிற்கு அதிகமாக எதை சாப்பிட்டாலும் ஆபத்துதான். இது சிக்கனுக்கு பொருந்தும். தினமும் சிக்கன் சாப்பிடுவது தவறல்ல, ஆனால் சாப்பிடும் அளவில் நீங்கள் கவனமாக இருக்க வேண்டியது அவசியமாகும். சிலருக்கு சிக்கன் சாப்பிடுவது அலர்ஜியை ஏற்படுத்தும் அவர்கள் சிக்கன் சாப்பிடாமல் இருப்பதே நல்லது. வாரத்திற்கு மூன்று முறை தாராளமாக சிக்கன் சாப்பிடலாம்.